( القصة مستوحاة من أحداث حقيقية بس بتصرف بسيط للضرورة الدرامية التهكمية )
بما أنو أيامي على أرض الوطن باتت معدودة … والاجازة قربت تخلص … وبما أنو ما ضل ولامحل بالشام ممكن أنك تروح عليه وتاخود راحتك وانت عم تشم الهوا النضيف ..
لذلك قررت وبليلة مافيها ضو قمر أنو أطلع الساعة الواحدة صباحا ( مشان مايكون في بني آدم بالشارع ) وروح اتفرج على أحلى منظر ممكن انسان يشوفو .. وهو منظر دمشق من فوق قاسيون ..
طبعا أنا بالغربة عايش ببلد ( مسطح ) .. بلد يعتبر فيه مصطلح التوسع الشاقولي هو من البدع والمنكرات … لذا التوسع الأفقي فيه بخليك تركب سيارتك مشان تروح على أقرب بقالة لتجيب أنينة مي ..
طبعا ضل طول اليوم بيت الشعر تبع من قاسيون أطل يا وطني عم يرن براسي .. وأنا عم بتخيل حالي عم شوف بلدي من فوق بكل ألوانها وصفاءها … وطبعا رافقها عدة أغاني وطنية متل ( موطني ) ..
المهم جهزت ترمس شاي ( متل يلي جابو زاهر عالرحلة ) و حملت حالي الساعة وحدة الصبح وطلعت بالسيارة على قاسيون …
طبعا بنص الطلعة يلي أبل الطريق الأفقي يلي مطل عالشام .. لقيت سيارة واقفة ادامي .. فخفت الزلمة يكون صاير معو شي .. فلما اجيت بدي انزل مشان شوف شبو .. اكتشفت سيارة تانية أدامو .. والسيارة التانية كان ادامها ثلاث ورباع … طبعا رفعت بصري لراس الطلعة لأكتشف انو السير واصل لفوق …
يالله … شو ماضل حدا بالشام مو طالع عقاسيون الساعة وحدة الصبح ..
لبين ماوصلت للطريق واكتشفت انو السير ممتد طول الطريق الأفقي والطلعة والنزلة يلي بعدون .. وطبعا كلها سيارات عم تحاول تصف ومو ملاقية …
حمدت ربي وقنعت بيلي كتبو وقلت لحالي بشوف البلد و أنا عم بمشي بالسيارة شوي شوي .. أحسن من بلا ..
لك شو هاد ؟؟؟ ما في ولا ميلي من الطريق كاشف البلد .. كراسي ملونة … أكشاك شاورما … قهاوي .. بياعين عصير .. مطاعم … موزعين أراجيل .. ولاد عم تركض … لك نامووووووووس
يعني لو في فيضان بالشام والعالم طالعة هربانة على الجبل مو هيك … يعني تخيلت انو لو في واحد ساكن بساحة عرنوس وبدو يروح لعند رفيقو بشارع بغداد بيقلو ( ايه بس بدي شي ساعتين لوصل لعندك لأنو بدي مر من قاسيون ) !!!
مشان الله .. مشان النبي … لك زفة عرس ليش لتمرق من قاسيون ؟؟؟؟ … خلصت المحلات يلي ممكن السيارة تمر فيها بالشام ؟؟
بغمرة غضبي و أنا عم حاول لافي ميلي شوف منو البلد .. اجا ولد صغير حامل علبة ( شيكلوتس ) تقليد .. وصار يخبط عالشباك … ( علكة بخمسة علكة بخمسة )
اجتمعت براسي شياطين الدنيا … تزكرت كل المحلات بالبلد يلي مافيك تقعد فيها بدون ماتحجز أبل أسبوع … والفوضى … والزحمة .. وغلاء الأسعار … و الضغوط الدولية على البلد .. وأزمة السكن .. و البنزين … و المازوت … وانقطاع الكهربا …مع صوت زمامير السيارات … و دخان المكاري يلي عم تحول تطلع الطلعة .. وع صوت الخبط على الشباك من بياع العلكة .. طلعلي واحد بالراديو عم يجعر و يقول ( حلوة يا بلدي ) ..
ضربت ( فرينا ) قويا بنص الشارع .. ( مع انو السير كان واقف متل ما قلنا ) و فتحت الباب تبع السيارة ووقفت بنص الشارع وصرت أصرخ .. ( لك يا عالم .. يا ناس .. لك حرام عليكون .. ما ضل شي حلو ما انتزع بهالبلد ..حتى بلدي من فوق ما عاد احسن شوفها .. لك حرام عليكون ..بدي شوف بلدي ..لك هي بلدي … بلدي … بلدي ي ي ي ي ) …
بالاذن من أخي وصديقي العزيز سامو … اجا الحشاش نفسو تبع موضوع ( أنا ناس ) و سألني ( أديش كيلو السمنة البلدي يا حبيب ؟ )
أحدث التعليقات