مدونة إيكار – رياح التغيير

مرحبا …

 

سأكتب الموضوع التالي كاملا باللغة العربية، وسأرفق في نهايته (ملحقا)  لكافة العبارات والجمل المكتوبة داخل أقواس وترجمتها الى اللغة الانجليزية.

 

من منكم يعرف واحدة من أشهر سلاسل الألعاب على جهاز (الحاسب الشخصي)  وهي سلسلة (أمير بلاد فارس) ؟

اللعبة بدأت عام 1989 عندما نزلت على (قرصين مرنين) وكانت تعمل على ( نظام تشغيل الأقراص) ، تبعها الجزء الثاني عام 1994 وكانت تحت اسم (أمير بلاد فارس: الظل واللهب)  وقد نزلت على خمسة (أقراص مرنة)  وكانت آنذاك شغلة كبيرة حيث استغرق (تنصيبها)  معي نصف ساعة، الجزء الثالث صدر عام 1999 على (قرص مضغوط) وقد  شهدت السلسلة تحولا جذريا بانتقالها الى عالم (الأبعاد الثلاثية) ولكن هذا الجزء كان الأقل نجاحا.

 

المهم أن السلسلة عادت للظهور عام 2003 بنقلة نوعية رائعة، بدأت ب (أمير بلاد فارس: رمال الزمن) ثم (أمير بلاد فارس : المقاتل الضمني) عام 2004 و بعدها (أمير بلاد فارس: العرشان) عام 2005 ، وقد ظهر جزء جديد عام 2008 لم أستطع تجربته حتى الآن بسبب ضعف (بطاقة الاظهار) في جهازي الحالي في بلاد الغربة.

 

المهم أن الثلاثية التي صدرت بين عامي 2003 و 2005 شهدت تطورا جديدا على ( نظام اللعب) وهو باضافة (رمال الزمن) ، تتلخص فكرة (رمال الزمن) بأنك تستطيع خلال اللعب ولعدد معين من المرات – يزيد كماً وزمناً مع تقدمك في اللعب- أن تضغط على (زر الكتف) في (قبضة المتعة)، فيعود بك الزمن الى الوراء في حركة ( الخطف خلفا) لكي تنقذ نفسك من السقوط في (حفرة الأشواك) أو لمحاولة الهرب مرة أخرى من براثن ( الداهاكا) الذي يلاحقك.

 

المهم ، تخيل معي أنك تمتلك (رمال الزمن)، وتستطيع أن تستعملها في حياتك اليومية، تخيل معي المتعة التي ستستطيع أن تجنيها من امتلاكك لهذا العنصر الرائع، اليك بعض الأمثلة :

 

المشهد الأول :

بينما أنت جالس خلف مكتبك في العمل، منهك، مطمور تحت الأوراق، ولم  تتناول حتى غدائك بسبب ضغط العمل، يفترب منك رئيسك في العمل – تخيله سمين و أصلع  لغرض الفكاهة –  و أعطاك مجموعة من الأوراق:

 

(المدير) : لو سمحت  بدي هالأوراق تكون جاهزة عمكتبي بعد نص ساعة.

 

أنت : شو أمرتو سيدنا ؟ انشالله مفكر اني ما بعرف انك طول اليوم قاعد على (المرسال) على طق حنك مع الصبايا، وزاتت الشغل كلو على راسي وراسي الموظفين ؟ وبآخر الشهر بتقبض حضرتك الراتب المعلوم يلي بيسوى 3 رواتب من رواتبي وبتاخد كمان (تعويض اضافي) آخر السنة ؟  لك استحي على دمك يا طبل يا قليل الوجدان، قسما بالله لو أني صاحب الشركة غير لزتك بأقرب حاوية وغير بياع فلافل ما بخليك ، فعلا يلي استحوا ماتوا.

 

وبينما هو وباقي الموظفين ينظرون اليك وهم مشدوهون، تمسك المدير من صلعته و تديره باتجاه عقارب الساعة 180 درجة ، و تقوم ب (ركلة حول المنزل) فيطير أبو الشباب من مكانه ويستقر رأسه في أقرب سلة مهملات.

 

الآن نضغط على ( زر الكتف). ( خطف خلفا)

 

(المدير) : لو سمحت  بدي هالأوراق تكون جاهزة عمكتبي بعد نص ساعة.

 

أنت : تكرم عينك استاز، ربع ساعة بيكونو عندك.

 

 

المشهد الثاني:

 

بينما تسير بسيارتك في أمان الله، تتحول الاشارة من اللون الأخضر الى اللون الأحمر في ربع ثانية، ورغم ضغطك على (المكابح) بكل قوتك، الا أن السيارة تتجاوز خط عبور المشاة بخمسة سنتيمترات.

 

طبعا الشرطي الآدمي يقفز من مكان اختبائه ويركض نحوك وكأنه فتح الأندلس.

 

الشرطي : صف عاليمين لو سمحت.

 

أنت : ايه تكرم عينك.

 

الشرطي : أوراقك لو سمحت.

 

تناوله الأوراق النظامية.

 

الشرطي: ملاحظ انو تجاوزت الاشارة وصرت على خط المشاة ؟

 

أنت: لا والله ما انتبهت.

 

الشرطي: ليك، نزيل شوف ازا بدك.

 

أنت – والابتسامة على وجهك وبكل رواء- : مصدقك يا غالي.

 

الشرطي: هي فيها مخالفة 2500 ليرة.

 

أنت: يالله بسيطة، شو بدي ساوي، القانون قانون.

 

الشرطي: بس بتعرف يعني، كلون خمسة سانتي يلي قطعتون، ماحرزانة تدفع 2500.

 

أنت – مع كامل الابتسامة- : لأ شلون يا أخي، القانون قانون، كتوب المخالفة يلي يتريحك.

 

الشرطي: سماع مني، أنا من عندي بمشيلك ياها بلا مخالفة.

 

أنت : لا يا رجل، هي مخالفة ، ولازم اتعاقب مشان ارتدع.

 

الشرطي: طب معك علبة اسعاف وطفاية.

 

أنت : لا والله يا حبيبي، نسيت نزلهون معي.

 

الشرطي: طب هي كمان مخالفتها 2500، بس كمان ما رح خالفك ، لأني شايفك زلمة محترم وبتفهمها عالطاير.

 

أنت – بكافة ملامح الجدية – : فعلا يا أخي أنا زلمة ما بستحي، ما بكفي اني قطعت الاشارة، وكمان ما معي طفاية وعلبة اسعافات، يعني أنا فعلا زلمة بدي ترباية وأنا مصر انو اتخالف، ولو سمحت تطبق العقوبة الأشد، لأنو القانون قانون، والقانون فوق الجميع.

 

يتجه الشرطي الى دراجته الآلية، يحرر مخالفتين، يعود اليك وهو في ( مأفوش) ، تأخدها منه ، تعطيه ابتسامة عريضة وتتحرك بالسيارة.

 

 الآن نضغط على ( زر الكتف). ( خطف خلفا)

 

 

الشرطي : أوراقك لو سمحت.

 

تناوله الأوراق النظامية، وبحركة خفية يكون المعلوم صار داخل الدفتر.

 

الشرطي:  تيسر استاز، الله معك.

 

 

المشهد الثالث :

 

مع صديقك في القهوة.

 

أنت : أبو صطيف، شو صار بالألفين ليرة يلي عأساس آخر الشهر بدك ترجعلي ياهون ؟

 

أبو صطيف : لك خليها لربك يا مواطن، هادا صار معي فصل غير شكل، الشركة ما عطونا الراتب هالشهر و قال لسه ما في (سيولة)، عأساس يحاسبونا الأسبوع الجاية، طولي بالك شوي.

 

أنت : لك الله يلعنك شو نصاب، أنا مبارح شفتك داخل عمحل الموبايلات وشاري موبايل جديد، عم تدين مني وبتعرفني مزنوق ولو ما حلفتلي ميت يمين انو مشان دوا لابنك ما كنت دينتك ، بيطلع عم تشتري موبايلات مشان تتفشخر حضرتك عالبنات يا تقبر ستك، يرحم جدك يلي كان ما معو الليرة مشان يحكي فيها بالتليفون أبو الليرة، فعلا ما بتنعطى وش يا نصاب يا (حثالة).

 

الآن نضغط على ( زر الكتف). ( خطف خلفا)

 

 أنت : أبو صطيف، شو صار بالألفين لية يلي عأساس آخر الشهر بدك ترجعلي ياهون ؟

 

أبو صطيف : لك خليها لربك يا مواطن، هادا صار معي فصل غير شكل، الشركة ما عطونا الراتب هالشهر و قال لسه ما في (سيولة)، عأساس يحاسبونا الأسبوع الجاية، طولي بالك شوي.

 

أنت : ولا يهمك حبيب ألبي، خود راحتك، الله يصبرك على هالشركة.

 

 

كم هو جميل لو أننا كنا نملك (رمال الزمن). فكر بمئات الأشياء المسلية التي تستطيع القيام بها.

 

 

ملحق = Glossary           

الحاسب الشخصي = PC

 أمير بلاد فارس = Prince of Persia

 قرص مرن = Floppy Disk

 نظام تشغيل الأقراص = Disk Operating System  أو DOS

أمير بلاد فارس – الظل واللهب = Prince of Persia : The shadow and the flame

تنصيب = Setup

قرص مضغوط = Compact Disk  أو CD

الأبعاد الثلاثية = 3 Dimensions  أو 3D

أمير بلاد فارس – رمال الزمن = Prince of Persia – Sands of time

أمير بلاد فارس – المقاتل الضمني : Prince of Persia – The warrior within

أمير بلاد فارس – العرشان : Prince of Persia – The two thrones

بطافة الاظهار= Display card

نظام اللعب = Game play

رمال الزمن = Sands of time

زر الكتف = Shoulder button  وهو زر على أقصى يمين أو يسار ( قبضة المتعة)

قبضة المتعة = Joy pad

الخطف خلفا = Flashback

حفرة الأشواك = Spikes pit

الداهاكا = Dahaka هو أحد المخلوقات الموجودة في اللعبة وهو يهدف الى تقطيعك اربا، وعندما يظهر في اللعبة، فإن الحل الوحيد هو أن تركض دون توقف.

المدير= Boss

المرسال = Messenger

تعويض اضافي = Bonus

ركلة حول المنزل = Roundhouse Kick  وهي حركة من أيام لعبة ( القتال المميت)

القتال المميت = Mortal Kombat – حرف ال K  بدل ال C  ليس خطأً مطبعيا.

المكابح = Brakes

مأفوش = Pissed

سيولة = Cash

حثالة = Scum