عطفا على ما كتبتبه فراولة في مدونتها عن المصعد، أدعكم هنا مع بعض الأفكار المسلية التي يمكن فعلها ريثما تنقضي هذه اللحظات العصيبة في المصعد :
1 عندما يأتي شخص من الذين يستعجلون المصعد عن طريق كبس الزر مرات ومرات رغم انه مكبوس ، ارمق الشخص وقل له : سمعتلك انو شركة ( … ) – الشركة المصنعة للمصعد – عاملة طريقة انو ازا كبست الزر تبع الطلعة عشر مرات و بعدين النزلة عشر مرات بعدين زقفت عشر زقفات ، بيجي لعندك المصعد وين ماكان و بأي طابق .. عاملينها مشان الحالات الطارئة .. بس لا تحكي لحدا …
ستضمن بذلك أن يجرب الشخص هذه الطريقة على أي مصعد .. و بذا تضمن مقطع كوميدي في كل مكان يتواجد فيه الأخ.
2- وأنت واقف داخل المصعد مع مجموعة من الأشخاص ، حرك رأسك بسرعة نحو لوحة الأرقام ، اجحظ بعينيك و قل ( ولي … يالطيف … شو هاد ) و حاول أن تتمسك بحركة سريعة بالدرابزين ، سأضمن لك بعض الصرخات النسائية و ربما سيضطر بعضهم الى زيارة طبيب القلبية.
3- عندما يكون هنك شخص واحد في المصعد ، قف خلفه ثم انقر عله كتفه ، عندما ينظر اليك ، ستكون طبعا تنظر في الاتجاه الآخر ، ثم تدير رأسك فجأة وتسأله ( ليش عم تطلع يا حبيب ؟ ).
4- عندما تكون يجانب لوحة الأزرار ، وتدخل سيدة ، إسألها الى أي طابق تود الصعود ، فإذا قالت الخامس مثلا ، اضغط على السابع و اشغل نفسك بأي شيء ، وحاول أن تحمي اللوحة من محاولتها تصحيح الخطأ .
5- أبقي الأبواب مفتوحة على أحد الطوابق وقل للموجودين أنك تنتظر صديقك ، وبعد دقيقة أغلق الباب بهدوء و قل ( شلونك أبو سمرة ؟ ) و اقضي المسافة كلها في الحديث مع أبو سمرة الوهمي.
6- أسقط قلماً على الأرض و اتركه ، عندما ينتخي أحدهم ليحضره ، انظر اليه وقل ( لو سمحت هادا قلمي من بعد اذنك ).
7- تظاهر بأن مكالمة تلفون خليوي قد أتتك ، ارفع السماعة و قل ( ألو ) … صمت .. ثم اصرخ بصوت عالي ( ولي ، رح يكمشوني ، لازم خبي البضاعة وسافر برا البلد ) و حاول أن تضغط بعصبية على زر فتح الباب .
8- لاضفاء بعض الروح المرحة على رحلة المصعد ، قل بين كل لحظة وأخرى ( في صوت غريب يا جماعة ، حاسس انو في شي مو طبيعي بهالأصانصير !!! )
9- طبعا الحركة الكلاسيكية المعروفة و هي الوقوف بالزاوية و ظهرك للركاب ، مع تمتمة كلمات غريبة مثل ( لا بتآزونا و لا منآزيكون ) مع شهيق و زفير سريعين ، سيضمن ذلك بعض الوجوه المرعوبة.
10- متابعة لرقم 2 ، بإمكانك النظر برعب الى أحد الأشخاص و أنت تجحظ بعينيك ، وعندما يبدأ المصعد بالحركة تراجع إلى الخلف و اصرخ ( انت واحد منون !!! ) .
11- كلما ضغط أحدهم على زر ، أصدر صوتا مثل ( تين تون ) ، وكلما فتح الباب أصدر صوت ( بششششش ) .
(يتبع)
( بعض الأفكار مقتبسة من مقالة بالانجليزية )
صرلي زمان ما زرت مدونتك والواضح انه كتاباتك ما زالت رائعة
أفكار جميلة بس ما بتصير غير بمكان عام
يعني تصور عم اعمل مقالبك بالبناية يلي ساكن فيها والله بيفضحوني الجيران
هههههههههههههههه
فظيعين كل وحدة احلى من التانية
ياترى انت جربت شي وحدة منهن ؟؟ ^__^
Che : أشكر لك مرورك ومشاركتك، لازم أكيد تتأكد انو ما حدا بيعرفك بالمصعد … أكيد متخيل التعليقات والصورة يلي رح تتكون بذهن الناس يلي شاركوك هاللحظات الممتعة.
كيفك سووس … هاد بمطار الرياض عملناها مرة بالأصانصير الكبير ، طلعو معنا عيلة وعملنا أنا ورفيقي الخطة رقم 2 … ماعاد عرفو شو صار ووقت فتح الباب ركضوا كلهون لبرا … بس الصراحة رفيقي كان تمثيلو طبيعي بشكل، وأنا حاولت جاريه خصوص انو ماكان مخبرني بالخطة من قبل .
بانتظار الجزء الأصعب
وبانتظار عودتك أون لاين
تحية أنوس
حلوة وملعوبة…. بس كإنها بتوقع القلب فعلا لو انعملت.. والله حرام.. بس بتعرف هيك بتشغل الاطباء النفسية والقلبية
تحياتي
فريزة : الأصانصير عطلان حالياً .. بس عم نجمع شوية أفكار من هنا وهناك …
موون لايت : أهلا بك في المدونة … تقبلي تحياتي …
بسم الله الرحمن الرحيم
هلأ بس أنا بدي أعرف معقول إنتو طلاب ثالث إعدادي مثلاً
أو بالكثير أول ثانوي
لأنو أخي انس بتعرف ؟
هي حركات هذا العمر
يعني بس بدي إفهم
ما وجه المتعة بالموضوع
كم حالة قلب وكم حالة ارتفاع ضغط واحتمال إغماء من الرعب اللي رح تثيرو بنفوس هالناس المساكين اللي وقعن حظن السيء بين إيديكن
بعدين إذا عاملين هي الحركة بالرياض إيه بدي ذكرك إنو الناس فيها بموتو رعب من شوية غبرا بدك ياهن يتحملو هيك مقالب
يعطيك العافية حلو اكثير بس بنصحك
لا تجرب هي المقالب إذا كنت أنا موجودة بالمصعد
لأنو ساعتا ما بعرف شو رح يصير
بس بجد بدي أعرف
معقول إنت ورفيقك شباب مراهقين لتعملو هي الحركات بالناس ؟؟؟
تحياتي
مبدع كعادتك حتى في سخريتك.
دمت بود أخي الكريم .
والله يا نووش لا ولدنة ولاشي .. أنا وصديقي كنا مسافرين برحلة عمل باعتبارنا مدققي حسابات … يعني كنا لابسين بدل رسمية وعلى آخر طرز .. و الصراحة مابعرف شو خطرلو و ليش أنا مشيت معو …
الموضوع هو عبارة عن أفكار تحشيشية … ماصار وطبقتها قبل … وما بظن إني رح طبقها … والله لا يجمعك بواحد قرأ الأفكار وحب يطبقها بأصانصير واحد .. قولي آمين ..
ما رح قول غير آمين
الله لا يجمعني يا رب بناس عندا هيك أفكار
لأن يمكن في ناس بيتقبلو هيك مزح
بس أنا جدية زيادة عن اللزوم
شكراً إلك
تحياتي
اكتر شي عجبني تبع القلم
لو سمحت قلمي هاد
ههههههههههههههههههههههههههه
نووش : أهلا بك .. وعذرا على التأخر في الردود
سفر : يعني عم اتخيل منظر الزلمة المسكين يلي مفكر حالو عامل خير … أشكر مرورك.