مدونة إيكار – رياح التغيير

لدينا مخزون لا يستهان به من الحكم والأمثال لكل مناسبة، ولكن التناقض الموجود أحياناً في بعض منها يجعلنا نتساءل …

هل المشكلة في المثل أو الحكمة ؟ أم في تطبيقنا لها ؟

لننتقل إلى اللهجة العامية لأنها تناسب الموقف.

بتكون معزوم عند جماعة صحابك ببيت حدا من الشباب بالزبداني، وجايبين هالمشاوي من عند الفاروق يا معلم ، بس شكلو الأكل قليل لأنو كل واحد من الشباب جايب 2 من جيرانو بدون ما يخبرنا، آل يعني انو شباب ومارح تفرق.

نبدأ اليوم لما كلنا ننحشر بالغرفة يلي فيها مكيف، وطبعا مو حاسبين حساب هالكم الهائل من الشباب يلي اجو .. بينط صاحبنا وبيقول : ” بيت الضيق بيسع ألف صديق ” ضروري يعني نقعد بحضن بعضنا كلنا و ننحشك على الكنبايات ولا نقعد مقرفصين كلنا لما بدنا نلعب شدة ، بس لأنو نحنا ألف صديق ؟؟

بيجي وقت الأكل ، منتجمع كلنا حوالين هالطاولة وعليها هالكم صحن كباب وشقف و مقبلات لعشر أشخاص حسب الاتفاق، بس نحنا 25 زلمة حسب الواقع، بيتطلع فينا هادا يلي جايب معو البناية كلها وبيقول : ” يلا .. لقمة هنية بتكفي مية ” اي لئي … ما حزرت … مو ضروري قضي يومي كلو ومالي آكل غير قطعة شيش طاووس وحدة وما حسنت حتى حطلها توم بعد ما تبخر كل شي عالطاولة مشان حضرة جنابك تسكتني بهالمثل الفظيع. و ما معرفتو ليش ما طلعلي غير هالقطعة ؟ هادا صاحبنا وقت بدنا نبلش ناكل اتطلع بالكل وقال : ” بسم الله … يلي بيسبق بياكل فستق ” طبعا كان هالمثل العجيب كافي لأنو الشباب ينقضوا على بعضهون، ويختفي كل شي عالطاولة بغضون ثواني … لأنو بتعرف يلي ” سبق نبق .. أو مرق … مدري شو المثل ” ولما حسنت وصل عالطاولة ، لقيت قدامي قطعة هالشيش والشباب كانوا انهوا على كل شي ، واحد من رفقاتنا انتبه انو ما حبيت ذوقا اني ادخل بهالمعمة وذل حالي مشان هالكم لقمة، فدافع دفاعا مستميتا عن هالقطعة وتركلي ياها، وقلي تفضل أنوس، مازادلك غير هالقطعة، بهاللحظة صديقنا ما غيرو طلع فينا وهو عم يكمل حشو سيخين الكباب معاً جوا تمو وقال ” معليش ، الفضلة للفضيل ” شو هالحكي ؟ فضلت على راسي …

بعد الأكل ، الشباب فورا قعدوا وعملو شاي وفتو الشدة ، طب هالأكل والكياس والزبايل يلي تركتوها وراكون ؟ طبعا كلو عامل مطنش ، فأنا أشفقت على صديقي يلي رح يضطر ينضف كلشي باعتبارو الخاروف الغبي يلي فتحلنا دارو و أكل خازوق مرتب بعدما نروح، فبلشت ضب بهالكياس وفضي الصحون من الوسخ استعداداً للجلي ، صاحبنا بيطلع علي من موقعو وهو عم يلعب شدة و بقول : ” كبير يا أنوس ، سيد القوم خادمهم ” !! يستر على عرضك ، مشان الله ، يا ريتك ضليت خرسان ، يعني كنت مبين انو شباب وعم نتساعد بالتنضيف ، فحضرتك شلقت الدبب هلأ اني صرت خادم القوم يلي مفروض كون سيدهم …

يحرء حريش هالأمثال التبريرية السخيفة ، كل شخص بدو يبرر فعلتو بيطلعلنا بشي بيت شطرين موزونين وعالقافية مشان يبرر أفعالو …

س : ليش عم تسرق من عهدة الشركة ؟

ج : مهيه شركة نصابين و ” السارق من السارق كالوارث من أبيه ” .

س2 : برأيك هالزلمة ليش مدير أكبر شركة بالبلد و استثماراتو كلها ناجحة و مضرب المثل ؟

ج2 : ” بيطعمي الحلاوة ليلي مالو سنان

“س3 : مو لأنو يعني طول عمرو عم يدرس و ياخود شهادات و يشتغل بالليل والنهار ؟

ج3 : لا وحياتك ” يلي مالو حظ لا يتعب ولا يشقى ” مشان هيك أنا قاعد بالبيت ومالي خلق أعمل شي ، بعرف حالي مالي حظ.

ايه يعطيك العافية .